Mai Houston se New York jaa raha thha. Jahaz mai daakhal huwa to mujhay allot ki gai seat kay barabar baithhi eik noujawan khatoon apnay mobile phone per baat kar rahi thhi. Mobile phone go apni afadiyat kay aitbar say hamari zindagi ka ayhm hissa banta ja raha hai. Laikin awami jaghoo pay iss ka istaymal aisa hai jaisay aap loudspeaker per apni guftagu nashar kar rahay hooN. Baat karnay walay ko baharhal iss ka ehsaas nahi hota kay ussay doosary bhi sunn rahay haiN aur eik to wo doosrooN ka sakoon gharat kar raha hai doosra wo apni niji zindagi ki kahani mai unginat logooN ko shareek kar raha hai. Khair khair kar kay jahaz kay darwazay bund huway aur ussay mobile phone ka silsila munkata karnay ki darkhawst kar di gai. Uss kay miaN ko jail ki saza ho gai thhi aur yehi uss ki parayshani ka sabab thha.

Mosufa nai phone gowd mai rakh kay rowna shuroo kar dia. Mai aisay halat say kabi dochar na huwa thha. Ajeeb baysakooni ka aalam thha. Aur yea bilkul samajh mai nahi aa raha thha kay mujhay kya karna chahiay. Khair mai nai hosla kar kay puchh hi lia kay go yea tumhara niji moamla hai magar basa ouqat dil ki baat kayh daynay say dil-o-dimagh per paRa huwa dabao kam ho jaya karta hai. Agar tum munasib samjhoo to mai tumhari parayshani sun sakta hooN. Aur youN bhi ham safar mai haiN. Eik dusray ko jaantay bhi nahi aur yea mahaiz ek itefaq hai kay chand ghantooN kay liay ek dusray kay saath hai phir namaloom kabhi milaiN gay bhi ya nahi. Ess liay waqt guzari hi kay liay sahi ham eik dusray say apni baat kayh bhi saktay hai. Eik dusray ki baat sun bhi saktay hai. Aur meray khiyal mai tumhaiN apnay dil ka bhoj halka karnay mai koe wajayh maanay nai ho to mai ess baat kay liay tayyar hooN.

Uss nai nazar bhar kar mujhay dekha. Eik toweel saans li aur kayhnay lagi shayed tum theek hi kayhtay ho. Phir qadray towaqaf kay baad boli kay haaN mera khayal hai kay dil ki baat kayh daynay mai koe harj nahi. Yaqinan meree tuwajoh bhi meree paraishani say hut jae gi aur waqt bhi kut jae ga. Magar tumhaiN yea tamaam baat sun kar mujhay apni aara say agaah karna paRae ga. Taa kay mai koe fasla kartay waqt uss kay her payhloo ka jaaeza lay sakooN. MaiN nai esbaat mai sir hila dia tou uss nai apni baat shuroo ki.

Kayhnay lagi kay mai shadi-shuda hooN. Apnay shoher say mohabat karti hooN. Ham eik dusray say das saal say mutaraf hai. Shadi ko chhay saal ho chukay. Do bachiaaN haiN hamari. Mai nokri karti hooN aur bachiaaN mai kaam pay jaatay samay apni walda kay haaN chhoR jaati hooN. Abb bhi mai un ko apni walda kay haaN chhoR kar apnay miaN say milnay ja rahi hooN jisay NEW YORK police nai drug business mai mulawas pa kar shamil-e-taftish kar lia thha. Aur abhi mujhay phone say itlaa mili kay ussay saboot-o-shuwahid ki binaa per saat saal kay liay jail ho gae hai. Jab ham milay thhay to mujhay us kay kaam kay baray mai elm na thha. Uss ki noukri mai safar baytahasha thha. Laikin us kay atwar say mujhay kabhi shak nahi huwa kay wo iss kaam mai mulawas hai. Wo eik achha dost, achha shohar aur achha baap raha hai. Mujhay uss say kabhi koe shikayat nahi rahi. Do saal qabal bhi ussay aisay hi ek case mai mulawas kiya gaya thha. Magar wo adam saboot ki bina per baree kar dia gaya. Aur meray puchhnay per bhi us nai apni baygunahi per hi israr kiya. Uss waqt mai nai ussay kaha thha kay mai tum say pyar zaroor karti hoon laikin jiss din mujhay maloom huwa kay tum kissi buray kaam mai mulawas ho to hamari rahaiN eik nahi rahaiN gi. Ess liay agar tum abtak kissi aisay kaam mai mulawas rahay ho to bayhtar hai ka uss say kinara kar lo. Magar uss nai iss qisam kay kissi bhi kaam mai shamuliat say qatai inkar kiya aur kaha kay ussay ghalat-fahmi ki buniyad per iss case mai mulawas kar dia gaya thha. Wo hergiz hergiz yea kaam nahi karta. Abb jab kay uss ki drug kay karobar say shamuliat sabat ho gai hai. MaiN nai sanjeedagi say kissi hatmi faislay per pohanchnay kay liay musalsal ghor kar rahi hooN. Abb meray saamnay bohat saaray nukaat hai jo uss say apna taaluk joRay rakhnay say nafi ka izhaar rakhhtay hai. Jin mai chand aik maiN tuhaiN bataa bhi dayti hooN. Eik uss nai mujh say jhoot bola. Dusra mujhay apni bachiooN per kissi mujrim ki parchhayeeN nahi chahiay. Teesra wo shayed jiss kissi maafia kay zairayasar kaam kar raha hai uss say naata toRna shayed uss kay liay mumkin na ho. Chothha wo jis kisam ki aamdani ka inhasaari hai wo ussay koe dusra kaam karnay mai maanay hi rahay gi. Laikin mai uss say pyar karti hooN aur iss mai koe shak nahi. Magar kya mujhay kissi aisay shakhs kay liay apni zindagi kay saat saal zaya karnay chahiaN jissay drug jaisay ghinounay karobar mai siraf apni zaroorataiN nazar aati hooN. Magar moashrati bigaR na dikhhae dayta ho. Jissay apna ghar saNwarnay ka khayal ho magar dusroo kay ujaRtay gharooN say ussay sarokar na rahay. Mai abhi kissi natijay per nahi pohanch pai. Mai uss say milnay jaa rahi hooN aur do tok guftagu karnay bhi. Magar kya mujhay iss mushkil waqt mai uss kay saath khhaRa hona chahiay ya mujhay kinara kashi kar layni chahiay. Tum iss saari surat-e-haal ko kiss nazar say daykhtay ho.

Maine ussay kaha kay tum jis nahij pay souch rahi ho aur aaenda zindagi kay her payhlu per jis tarah apni nazraiN jamaae huway ho. TumhaiN to kissi mashwaray ki zarorat nahi. Baharhaal mai tumhari baat ko aagay baRhanay say payhlay tumhaiN yea batana zaroori samajhta hooN kay agar yea waqaya maira ilaqay ki kissi aurat kay saath paish aaya hota to wo kya karti. Hamaray haaN ki aurat apnay miaN kay saath khhaRi hoti khwa wo aybi hota, mujrim hota ya ghalat-kar. Hamray haaN shadi basa auqat galay ki maala nahi phhanda ban jaya karta hai. Laikin phhir bhi baychari aurat (aksar-o-bayshtar) apnay miaN kay intezar hi maiN zindagi guzar dayti hai. Jo maiN samajhta hooN darust nahi. Magar hamari muashrati wajuh ussay her raast qadam uthhanay sai rokti haiN. Hamaray haaN ki aurat itni azaad nahi kay apnay achhay buray kar faisla khud kar sakay. Ussay apnay faislooN mai apnay baap bhai aur deegar khaandani baazurgooN ko shamil karna paRta hai. Jin ki raaye uss ko naa chahtay huway bhi maanana paRti hai. Kabhi un ki raaye mai apnay upar aanay wali zimadariooN say bachna bhi ho sakta hai. Mai nai ussay kaha kay eik bhai ki hasiat say agar mai faislay ki kudrat rakhta tu maira mashwara tuhmaray alag ho jaanay hi ki taeed mai hota. Kay zindagi uss kay liay zaya kar daynay mai harj nahi jo halaat say pit kar jail chala gaya ho. Laikin zindagi uss kay liay zaya karna hargiz munasib nahi jo waqayat ka sabab jail gaya ho aur us kay dubara bhi jail jaanay kay imkanaat ko radd na kiya ja sakta ho. Ess kay elawa tumhari iss baat mai bhi wazan hai kay jo apna ghar chalanay kay liay dusrooN ka ghar jalaanay say guraiz na karta ho wo shakhs itbar kay qabil nahi. Mai nai kaha kay mai tumhari iss souch ko salam kar ta hooN. Aisi souch agar sab ki ho jaae to moashraah apni surat na badal lay. Log darust na ho jaaeeN.

Maine uss kay chehray per nazar daali to uss per baRa itmainan thha. Jaisay wo kissi natejay per pohanch chuki ho. Jahaaz NEW YORK kay JFK airport per uttar chuka thha. Mai nai ussay alwidaa kaha aur dusray terminal ki taraf baRh gaya kay mujhay wahaN say dusra jahaz pakaRna thha.

View and Post comment on this article