Mujhay achhi tarah yaad hai kay hamaray bachpan kay dinnoo mai jab bhi moharram ka mahina aata to sakht garam mousam kay bais Lahore mai jagah jagah paani, doodh aur sharbat ki sabeelaiN laga karteeN. Hamara gahr chouNkay circular road par waqaya thha layhaza mukhtalif elaqouN say aanay walay maatam kunindgaan hamaray gahr kay saamnay say guzartay huway Imam bargah Gamay Shah ko chalay jaatay. Ham bhi kar-e-khair mai shamil honay ko tayyar, baR chaRh kar haazreen-o-naazareen ki piyas ka sad-e-bab kartay, unhaiN paani pilatay aur suwab-o-taskeen hasil kartay. Kae eik sabeelooN per to banner lagay hotay jin per likhha hota kay “PAANI PIYO TO YAAD KARO PYAS IMAM HUSSAIN KI” sabeelooN ka yea silsila moharram ki payhli say laykar dasweeN tak chalta. Phir chaleeswaiN walay din bhi yehi ehtamam huwa karta.

Un dinnoo gahrooN mai sayhan aur chhatouN per mitti kay choRay bartan mai paani aur daana daal kar parindouN kay liay rakha jaata aur baRi zimaadari say uss ki nigayhdasht bhi ki jaati. Tabiyat aur mizaaj mai insaanouN ka hi nahi balkay parindouN aur jaanwarooN ka khayal karna bhi issi ghair manous tarikay say sikhhaya jaata thha. Mai jab bhi ghost laynay jaata billi kay liaay chithhRay laana na bhhulta halaaNkay ham nai gahr mai billi ya kutta kabhi paala hi na thha. Yea cheezaiN aaj ki zindagi say nikal hi gae haiN shayed….

Baharhaal dasweeN moharram ka baRa maatmi jaloos Lahore mai chowk nawab sahib say shuroo hota aur hamaray gahr kay qareeb Lower Mall pay waqaya Imam bargah Gamay Shah per ikhtitam pazir hota. Uss din bhi bohat say chhoti chhoti tukriooN mai batay maatmi jaloos khobsurat taziooN ko liay hamaray gahr kay saamnay say guzartay. Shurakaa ki tuwazoo Tthanday paani, sharbat aur doodh ki sabeelooN say ki jaati. Mohabat, yagaangat aur bahmi ehtram ka wajood kissi bhi tafreek-o-munafrat say abhi aashnaa na huwa thha. Moharram kay dinnoo ka ehtram sab hi yaqsaaN taor per kartay aur chayhlam per bhi bila tafreek ghuraba aur zarooratmandouN mai khhana taqseem hota. Zindagi ki yea rawish nihayat pursakoon aur laiq-e-sataish thhi.

Meray maazi ki yea tasweer bhi khasi waazay hai kay hamaray gahr kay saamnay aur gird-o-nawaa mai bohat say mustakil noeyat kay zameeni karobar karnay walay moujood thhay. Eik tasavir ko frame lagata thha. Eik nai filmi kahaniooN, gaanooN, jadoo waghaira ki kitabooN ka khouncha laga rakha thha. Do adad black and white tasavir baRi plat walay camerooN say utarnay walay mahir cameramen thhay jinn say Lahore kay zaaereen galay mai jaali pistol laga kar baRay dilchasp andaz ki tasavir utarwatay. Teen najumi thhay jo logooN ko kismat ka haal batatay. Eik totay say faal nikalwata. Eik daant nikalnay wala bhi thha jis kay paas logooN kay nikalay huway daantouN ka khazana thha jisay wo apni maharat ka zariaa batatay huway ek dhayhri ki shakal mai apnay zameeni showroom mai sajaa kay baithha karta. Ek shakhs kirlay jinn ki uss nay qamar toR rakhi thhi eik kapRay per line say sajaa dayta aur zarooratmandooN ko unka tail nikal kar baychta. Shaam honay per wo tamaam kirlay thhaylay mai daal kar hamaray main darwazay ki aaR mai rakhh jaata. Najoumi bhi apni mataa-e-rozgar woheeN chhoR diaa kartay. Inn mustaqil dukandarooN kay elawa wahaaN saara din rayhRee faroosh apni apni chalti phirti dukanaiN liaay aatay jaatay rayhtay.

Hamaray gahr say mutsal ek cinema thha. Jis kay bahar bhi khasay karobar khulay huway thhay. WahaaN per eik shakhs to shayed kanooN say mayl nikalnay ka kaam karta thha. Eik pathhuray lagata. Teen haleem baychnay walay bhi apni daygooN kay saath rozana apni dukanay jamatay. Unn ki haleem ka zaiqa hamaray door daraz kay rishtaydarooN ko bhi hamaray haaN aanay per mayel kiay rakhhta. Tali huwe machhli aur pakoRay bhi ek aisi soughat thhi kay hamaray mahmaan bilajijhak un ki farmayish kar daytay.

Un dinno taaNga hi ek popular suwari thhi. Ess liaay hamaray etraf mai ghoRoo ka chara bikta thha aur eik nai to saath mai ghoRoo kay khur aur taaNgay kay pahiyay thheek karnay ka bhi ehtamam kar rakhha thha. Hamaray gahr kay ultay haath data darbar, mohni road, ravi road, shahdrah aur seedhay haath ko urdu bazar, lohari, shah alami aur railway station paRtay thhay. Saamnay baagh thha jis kay bazoo mai akhhaRa thha jahaaN pahlwani sikhhai jaati. Uss say mutasal eik masjid thhi. Masjid kay saath eik shikari ki duwagaah thhi jahaaN uss nai company ki mashhori kay liaay sher kay elawa mukhtalif jaanwarooN aur parindooN ko bhi bhus bhar bhar kar khhaRa kiya huwa thha. Uss ki dusri jaanib naashraan-e-kutab ki dukanaiN thheeN aur eik adad duwakhana.

Hamaray gahr kay bachhwaRay mai machhli mandi thhi. Doodh faroosh thhay jinhooN nai baytahasha bahnsaiN paal rakhheeN thheeN. Eik bohat baRa khaymaa saaz edara thha jo partiooN per shamayanay aur bartan bhi mohayya karta thha.uss zamanay mai us kay malak kay paas baRee american gaRi thhi shayed Cadillac. Unn kay elawa bohat say rayhaishi makanaat thhay.

Itni tamheed-o-tafseel kay tuwasat mayhaz yea batana maqsood hai kay maktab-e-fakr kay log hamaray gird-o-nawaa mai aabad thhay laikin kissi ko na tou yea elm thha aur na hi yea maloum karnay ki kabhi zaroorat mahsoos huwe kay koun kya aqedah rakhhta hai, uss ka maslak kounsa hai. Wo kis mazhab say juRa huwa hai aur kyouN? HaaN albata yea sach hai kay sab bahmi mohabut-o-ehtram mai eik dusray say puri tarah juRay huway thhay. Yea to moharram ka mahina aata to hi logooN ko pata chalta kay shia maslak say koun munsalik-o-wabasta hai. Aur wo bhi siraf unn kalay rang ki kameezooN ki waja say jinhaiN shia hazrat moharram kay dinnoo mai ehtamaman zaib-e-tan kya kartay.

Pathar kay zamanay ki tarah aaj kay eitbar say wo zamana bhi qadeem hi thha. KyouN kay uss waqt na to aaj ki tarah computer thha, na mobile telephone, na internet aur na hi email ki si barak raftari. Ek radio hi radio thha jissay malumaat ka mamba samjha ja sakta thha. Deegar zaraae mai akhbar, rasayel aur kutab aatay thhay. Yaa phir baRay bhuhRooN ki kahi huwe qissay kahaniaaN. Inn kay elawa hasol-e-elm ka tamam ter zariaa zati mushahadaat per hi apni buniyaadaiN ustwar kiay huway thha.

Yea baataiN shayed 1963 ki haiN jab mai khhasa chhota thha. Issi liaay to uss zamany ki baataiN mujhay puri tarah say to yaad nahi laikin meray damagh kay kissi konay mai uss waqt ki kuchh aankhooN daikhhi baataiN aisay barajaman haiN kay unhaiN bhulna hi mumkin nahi. Zindagi mai youN bhi kuchh baataiN kuchh qissay kuchh kahaniaN aisi bhi hoti haiN jo zayhn say chipak kar rayh jaati hain. Aur waqt guzarnay kay bawajood wo apna taasur nahi chhoRteeN. Bachpan ka daykha huwa yea payhla fasaad thha jis ki koe tojeeh mera zayhn aaj bhi qabool karnay say qasar hai. Yea baat bhi mai bahartoar aaj tak samajh nahi paya kay insaan nai apnay ander janoon kay itnay bohat say rang kaisay, kiss tarah aur kyouNkar paal rakhhay hai. Wo lalich say janooni ho sakta hai. Mohabat kay hasul kay liay pagal ho sakta hai, nafrat mai aag laga sakta hai, mulk, qoum ya lisani growhbundiooN kay nam per jazbat ki row mai bayh kar her kuchh kar sakta hai, mazhab-o-maslak kay naam per khoon bahanay ko bila souchay samjhay tayyar ho jaata hai aur rahi aqal to wo to shayed iss saaray muamlay he mai baybas hai. Bardasht –o- udam bardasht ka falsafa bhi ajeeb si souch aur alag sa mizaj rakhta hai. Aur insaani zindagi per uss kay haqiqi asraat ka tajziaa karna yaqeeni tour per ek dishwar-e-kar hi to hai.

NoNweeN moharram ko kissi shakhsi namouwafqat kay bais chund noujawanooN mai androon-e-Lahore jagRa ho gaya. Jo talkh kalami say hota huwa haathapai tak jaa pohancha. Aur issi khhaychataani mai eik shakhs ghayel huwa aur jaan say haath dhoo baittha. Ess haadsay nai mazhabi munafrat ki shakal ikhtiar kar li. Muamla qatal ka thha aur issay qanoon ko hall karna chahiay thha laikin iss baat nai mazhabi rang pakaR liaa. Jiss kay bais shahr ki saari fiza mai mazhab-o-maslaki ki munafrat ki aysi boo rach gai kay kitni jaanay lay kar hi talli. Mazhabi ajaradarooN nai aytedal ko tarak kiya aur apni apni dukanai saja leeN. Qanoon nafaz karnay walay adaray harkat mai to aaye magar yea muamila un kay buss say bahar thha. DasweeN moharram ka maatmi jaloos bawajood security kay apnay ikhtataam ko pohanchtay pohanchtay ek baRay fasaad ka shikar huwa. LogooN nai eik dusray per pathrouN aur eeNtouN say barash ki. Khoon ki arzani aur logooN mai jaagi huwe wahshat nai weerani barpa kar di. Chakoo zanni kay waqayaat bhi huway aur shayed kahiN kahiN goliaN bhi chaleeN. Kay wo dour baharhaal baroodi aslay ki farawani ka dour na thha. Police nai ansoo gas ka baydragh istaymal kiya. Peenay kay paani ki sabeelaiN aankhaiN dhonay kay liaay istemal huweeN. Ham jo kam umar thhay yea sab kuchh hawanqooN ki tarah daikhhtay rahay. Insaan kay haathouN insaan ki tazheek-o-tazleel aur wo bhi siraf aur siraf maslaki tafreek kay sabab – wahaaN kissi ki kissi say zaati dushmani na thhi. Zaati taaluk na thha. Magar eik dusray kay maslak say nafrat youN payda kar di gae thhi kay her sou ussi ka raaj qaim ho chuka thha.

Hamaray gahr ki taraf ghayr shia hazrat ki ajaradari thhi. Laikin nafrat kay raaj mai bhi insaniat ki loo kabhi marti nahi. Hamaray baazurgouN nai apnay gahr kay darwazay waa kar diaay thhay. Iss fasad mai ghiray huway bohat say shia hazrat ko apnay gahr mai panaah di. Wo halaat qabou mai aanay tak wahaaN rahay. Aur phir wahaaN say jaatay samay wo apni kaali kameezaiN uttar kar waheeN chhoR gai. Aaj jab mai guzray waqayaat per nazar doRata hooN to yehi souch ubharti hai kay yea saara muamila kabhi iss hadd tak na bigaRta agar haalat ko bahmi faham-o-firasat say hall kar liaay jaata. QatlooN ko to shayed pakaR liaay gaya thha. Magar maslak kay thhakaydarooN nai apni apni dukanaiN chumkaeeN aur surat-e-haal ko aisa rang day diaa kay loog mazhabi munafrat aur maslaki tafreek mai ulhaj kar rayh gai,ess eik sanahay nai mazeed kitnay sanayhoo jo janam diya. Nafrat-o- bad etamadi nai tou mout kay diaay iss tarah jall uthhay kay unhooN nai kitnay hi aur diyouN ko aag day di. Jin ki loo abb gahrooN mai roshni nahi andayhrooN ko jalaa bakhsh rahi hai. Jaanay ham kab tak inn undayhray diyouN say apnay dilooN kay roshan chiragh bujhatay rahaiN gay. YouN bhi to ham nai iss munafrat kay khatamay kay liaay kuchh khas nahi kiya. Iss wayhshat ki agar kahiN hamaray ehabab nai koe charasaazi ki hoti, qanoon hi ko moasar andaz mai nafiz kiya hota to shayed ham aaj ki iss maader pidar azaad mazhabi aur maslaki munafrat mai iss buree tarah mubtalaa na hotay.

View and Post comment on this article