Editorial Music & Arts Humour Short Story Musings Reflections Guest Column Book Review Voice It Art of Living Prev Issue Next Issue

Par-des (Urdu) - Moizullah Tariq Malik Moizullah Tariq Malik works in an airline industry. He says reading and writing are more than a hobby to him. Click here to read Moizullah Tariq Malik's poems on SAWF.

Transcribed in Roman Urdu by Sahar Syed. Sahar Syed is doing masters in Computer Science from Karachi.

Lahore airport k cargo terminal per koi khaas rush na tha. Ziaada taadaad mai to hum aik hee khandaan k log thay.shayad jinhain qismat nai apnay uss musaafir ko lainay k liay cargo terminal per bulaa rakha tha jisay hamari nahi hamaray kandhon(shoulders) ki zaroorat thee. Iss flight k cargo section mai aanay waala taaboot(coffin) meray rishtay k chacha ka tha. Kuch arsay sai hum donon mai kisi hud tuk bai-tukkaluffi ka rishta bhi ho chuka tha. Woh euorpe mai kai barson sai muqeem(resident) thay. Kuch arsa germany mai rehnay k baad woh London aai. Jahan unhon nai aik gori khaatoon sai shadi kur lee.jisay woh maim keh kur bulaatay. Unn ka kunba(family) 5 afraad(members) per mushtamil tha. MiaN ,biwi aur teen bachay yaani aik larki aur do juRwaan (twins) laRkay.

Flight hasb-e-maamool (as usual) do ghantay late thee. Go(although) dhaiRon (lots of) rishtadaar Lahore airport k iss cargo terminal per moujood (present) thay..magar mai apnay under tanha rehnay ki shadeed (intense) khwaahish ko mehsoos kurtay hooway cargo terminal k baahar guzartee hoowee patlee see saRak per airport ki boundry wall k sath saath chul paRa. Yuun bi airport per PIA mai mera phoopi-zaad(cousin) kaam kurta tha.aur her qism (kind) ki kaaghazi karwaai(paper work) sai nibaTnay ki zimaadaaree uss ki thee.iss liay hum  to sirf taaboot mai band jism (body) hee wasoolnay(receive) aae thay. Sochon per to waisay hee ikhtiyaar nahi hota.magar khaas kur k inn lamhon mai jub kisi apnay ki mout ho jaai soch bai-ikhtiyaar hee nahi ..bai-baak bhi ho jaati hai. Zehn hai k baar baar unn dinon ki taraf palaT jaata hai jo marnay waalay k saath guzaaray thay. Aapas ki baatain yaad aati hain. Her beeta pal qareeb nazar aanay lagta hai...Aik saraab ki maanind(similar to). Magar such to wahi lamha hai jo zinda hai aur guzar raha hai. baaqi to saaree khayaali tashbeehaat (imaginary stuff) hain.

Insaan khud ko yuun to daanishwar (wise) samjhta hai magar kitni aajeeb baat hai k woh mout ko daikhta hai ,samjhta hai, mehsoos kurta hai per yaad nahi rakhta..bhool jaata hai. Jo log watan sai baahar hain..unn ka almia(tragedy) yeh bhi hai k woh apnay pyaaron ki khushi ya ghum mai shaamil nahi ho paatay. Mai bhi taweel arsay (long period of time) sai saudia arab mai muqeem (resident) huun. Aur yeh mehaz (mere) itefaaq(co-incidence) hee tha k mai apnay chacha ki wafaat (death) k waqt Lahore mai hee tha.

Gulf mai muqeem in riaaston(states) mai uss waqt tuk hee muqeem reh suktay hain jub tuk wahan per unn ki zaroorat moujood hai. Iss liay to woh khud ko aalam-e-barzakh mai tasawwar kurtay hain. Apni zaroorat khatam honay per  woh ya to wapas apni dharti(home land) ko louTtay hain.  Ya agar zindagi saath chHoR dai to wahi sai aglay(next) safar per chul paRtay hain. iss k bar-aks( contarary to that) maghrib(west) mai ja basnay waalay amooman(usually) apni dharti ko palaTtay hee nahi. Aur agar kabhi wapas aa jain to shayad taaboot (coffin) mai band ho kur hee aatay hain. Jo murda jism (dead body) ko Thikaanay lagaanay ka nisbatan(comparatively) sasta tareeqa hai. jahaaz k aanay mai abhi kuch waqt baaqi hai. Hum sub intizaar mai hain jo k aik mushkil kaam hai. Waisay kuch log intizaar ko aik aisay saanp(snake) sai tashbeeh(relate) daitay hain...Jo phun phulaay saamnay aa khaRa hota hai. magar na hee dDasta hai aur na hee hilnay daita hai. Aisee soorat-e-haal sai guzro to hee iss baat k sachay honay ka ehsaas hota hai. Yuun bhi intizaar mai insaan ho to aisa lagta hai jaisay waqt thum(still) kur reh gia ho.

Mai aik na-qaabil-e-biyaan kaifiat sai do-chaar huun (whatever i am feeling is un-explainable). Aur apnon ki bheeR mai bhi tanha...Apnay khaayalon ki time-machine per sawaar shayad apnay maazi ki taraf gaamzan huun. (despite of the crowd all aruond...i feel alone..i feel i am on  a time machine that takes me back to the past).

Marhoom ki dilchaspee(interest) parhaai k ilaawa her cheez mai rahi. Jis ki waja sai unn ki qabiliat 12 jaamat (grade 12) tuk aa kur Thehar(stopped) gai. Ghar per shikaayaton (complains) ka silsila baRha to woh bhi apni ehmiat(importance) kho(lost) gain. Waalid intiqaal kur chukay thay iss liay ghar mai control pehlay hee kamzor(weak) tha. Khaandaan mai jub unn k baaray mai manfi(negative) raai qaaym ho gai to unnhouN nai bhi iss ki parwah chHor dee. Magar baRon ka adab-o-ehteraam apni jaga qaaym raha...aur unn ka apnay aap ko baRa samjhnay ka shoq bhi. Iss baat ko mai wasooq sai iss liay keh sukta huun k baRon ka saamna kurnay sai to ijtinaab kurtay thay aur agar saamna ho bhi jaata to chupchaap sur jhukaay khaRay rehtay.jub unn sai kabhi hamara aamna saamna ho jaata to hamai poochtay bhi aur Tok bhi daitay. Aik dafa mujhay ishaaray sai bulaaya aur bolay 'suna hai tum cigarette peenay lagay ho'. Meray inkaar k bawajood meray daanton ka muaaina kur k apni tassalli(satisfaction) ki.

phir aik din pata chala k woh europe chalay gai. Sub nai sukh ka saans lia kion k roz roz ki shikaayaton aur unn k azaalon(repentance) ka sissila hee to tha...jo unn k jaatay hee khatam ho gia tha. Mukhtalif mulkon(countries) sai hotay hooway woh London aa gai. Phir suna k unhon nai wahan shadi kur lee hai. Baad mai woh dil ki beemari ka shikaar hoooway.by-pass surgory kurwa lee. Unn hee dinon mai maiN nai bhi baahar ki raah lee. Magar meri manzil saudi arab thee.

Kuch saalon baad mai London gia to unn sai mulaaqaat hoowee. Unn ki mohabbat aur tawajjah(care) mai apnon sai milnay ki khushi ka taasur(feeling) bohat numaayan(dominant) tha. Mai kaafi baar London gia. Aur unn sai mulaaqat bhi hoti  rahi. Aik din apni beti ko daikh kur mujhay kehnay lagay yaar kabhi kabhi mujhay khof aata hai k booRhi omar(old age) mai meray hathon kisi goray ka qatal na ho jaai. Mai nai kaha kion? bolay'yahan k social setup ki waja sai'. 'larki bari ho kur agar kisi goray k saath chali gai to shayad mujhay yahi kurna ho ga'. Mai nai unn sai kaha' yeh masla aap ki tarbiat hee hul kur sukti hai'. Magar unn ki yeh soch ..unn ka yeh khayaal to shayd meray ander hee utar gia.

Hum log bhi ajeeb hain.shayad aziat-parast hain.aaj ka hul(solution) dhoonD lain to kul ki fikar ho jaati hai. Khouf aur andeshon mai zindagi guzaartay hain.aur pereshaan hee rehtay hian. Maashi istehkaam(financial stability) ki talaash mai nikalnay waalay bohat sai log Euorope k mumaalik mai ja basay.aur ab jub unn ki olaad(kids) baRee howee hai to unn k khadshaat(worries) bhi baRh gai hain. Iiss soorat-e-haal ka ab ki reverse gear nahi hai. meray phoopi zaad nai mujhay baazoo sai pakaR kar jhanjhoRa to mai haRbaRa sa gia. Flight aa gai thee aur taaboot bhi. Taaboot ka ooper waala hissa alag kia.to sheeshay mai marhoom ka chehra nazar aa raha tha. Saath mai unnk bachon ki apnay baap k nama tahreerain(letters) theen.pyaar ka bharpoor izhaar liay hooway.

Dhartee(homeland) ka farzand(Son) aakhirkaar(atlast) uss ki khaak ka hissa hoowa. Unn ki angraiz bewa(widow) nai doosri shadi kur li. Aur hamari zindagi ki masroofiaat nai unn k bachon ko unn k haal per hee chHoR dia. Rabt TooT jaai to raabta nahi rehta. yeh dunya jo kabhi aik khaandaan per mushtamil(based) ho gee shayad aisay hee aik doosray sai begaani (indifferent) ho jaati ho gee. Jo amal apnay des mai chund naslon(generations) k baad zahoor-pazeer(occur) hota hai woh pardes mai do aik naslon mai hee nai shakal pakaR laita hai. Aur yahi woh sachaai hai jo apnay maashi istehkaam k liay pardes ka rukh kurnay waalon ko jaatay samay nazar nahi aati.

View and Post comment on this article