Editorial Reflections Humour Short Story Film Review Voice It Health & Fitness Prev Issue Next Issue

Do Mushaqati Haathh (Urdu) - Moizullah Tariq Malik Moizullah Tariq Malik works in an airline industry. He says reading and writing are more than a hobby to him. Click here to read Moizullah Tariq Malik's poems on SAWF.

Click here to read the article in urdu font

Hamari zindagi apnay ander ek darsgah da darjah rakhhti hai. Insaan amli zindagi kay tamamtar dars issi darsgah sai seekhhta hai. Yea zindagi hi hai jo insaan ko zinda raihnay kay dhang sikhhati hai. Ussai logooN say rabt-o-rowabat kay atwar samjhati hai. Mukhtalif ouqat mai mukhtalif logooN say insaan ko jo rawayya rakhhna chahiay wo zindagi hi ussay batati hai. Bohat say sabak insaan kitabooN say to seekhh laita hai magar uss ka barwaqt istaimal ussay zindagi kay tajarubouN say hasal hota hai.

Bahartour sachai to yehi hai kay zindagi ko samajhnay, jaananay aur seekhhnay kay liay insaan ko her uss insaan ka mushahedah karna paRta hai jissay zindagi uss say roushnas karwati hai aur jin mushahedati atwar ka taasur wo zindagi per taa hayaat maihsoos karta rayhta hai.

Mujhay theek theek yaad hai kay wo achhi khasi umer rasidah khatoon thhe. Hamaray gahr kay pichhwaRay eik kachay makan mai rayhti thhi. Apni khamedah qamar kay bais wo hamaray gahr (jo doosri manzal per waqaya thha) haathhouN kay bal siRiaN chahR kar aaya karti. Nashta karnay kay baad wo bartan aur kapRay dhonay mai meri walda ka haathh batati. Phhir kuchh dair idar udar ki baataiN karti, kuchh sastati aur wapas chali jaati. Yehi uss ka rozana ka mamoul thha. Uss ka iss umar mai kaam karna mujhay bohat mayoub lagta aur mai apni walida say aksar kaha karta kay iss say kaam karwae bina hi aap ussay paisay day dia karaiN. Magar unn ka kayhna thha kay mai ussay khairat day kar uss ki tazleel nahi kar sakti.

Mai umer kay jiss hissay mai thha wahaN izzat aur zillat ki zindagi abhi tak kitabi baataiN thheeN. Amli zindagi ki tadrees nai jab mujhay iss ka farak samjhaya tou mujhay ehsaas huwa iss khatoon ko kuchh aur to aata nahi thha layhaza uss nai logooN kay bartan dhona qabool kar lia laikin haathh phhailana pasand na kiya. Apni zahifi ko apni jawani ki aram talab zindagi ko yaad karnay mai zaya na kiya aur zindagi kay haqaeq ka khhulay dil say samana bhi kiya aur muqabala bhi. Aisay loog yaqinan ham jaisouN kay liay missal hi rahay.

LogooN kay mutabiq wo eik achhay khhatay peetay gahranay say ta’alouq rakhhti thhi. Uss kay gahr kaam karnay walay baishumar nouker huwa kartay thhay. Ferozpur say shayd uss ka ta’alouq thha. Berr-e-sagheer ki taqseem nai ussay gahr say bay-gahr kiya. Halat muafiq na rahay. Khandan toot kar bikhhar gaya aur wo Lahore aa kar apni zindagi ko maihnat mazdoori say kaatnay lagi. Uss ko mai nai kabhi shaaki na paya. Kabhi wo mujhay shikwa karti dikhhai na di. Apni mojudah zindagi say agar khush na ho gi to wo baizar bhi nazar na aae. Aaj sochta hooN tou uss jaisi mazbout esaab ki malik khatoon koe aur mujhay yaad nahi paRti.

Mujhay wo jab bhi milti, jahaN bhi milti, apnay dono haathh meray sir aur chehray per phhair kar pyar dayti aur itni duaooN kay saath kay mujhay apnay ander aik ajeeb si taaqat ka ehsaas honay lagta – wo yaqinan aisee hi ek shaksiyat thhi. Aaj bhi jab mujhay kabhi kissi paraishani ka saamana hota hai to wohi do mushaqati haathh meray sir aur chehray per phhirnay lagtay haiN aur mai apni uljhanouN kay khilaf apnay ander ek bharpoor quwat ko abharta huwa mahsoos karnay lagta hooN.

View and Post comment on this article